真人真事改篇，三年前無意中聽到呢個經歷，令我感到心酸，三年後既今日，唔知點解，我竟然將佢寫成小小故事。沒有目的，沒有評論，沒有對與錯之分，只係想分享出來而已。
************************************
好多人係讀緊書既時間都試過去追女仔，但好多時都唔成功。被追既女仔有部份係屬於靚女，既然係靚女，自自然然吸引好多男仔去追。
軒仔係其中一個例子。
軒仔有『三無』，無才，無錢，無樣貌。係追女仔既競技場上面，往往好容易輸比靚仔，有錢既對手，個一種直接硬生生咁被人打敗既感覺，相信好多人都會經歷過既話都會有好深刻既印象。
隨住時代變遷，年紀漸大，軒仔同身邊既人都睇化左，好多時都會對呢D經歷都係一笑置之，又或者咁講，唔甘心又可以點?
時間慢慢過去，軒仔當年鐘意既女仔已經由18歲變成28歲，無論樣貌同氣質都不復當年。
今日，軒仔照舊同一班中學同學出黎聚舊，好多朋友仔都已經搵到自己既另一半，開心又好，唔開心又好，都擁抱眼前人，以前既經歷同回憶，都只係屬於聚會上的一個話題。
志傑:『喂喂!當年你追個個阿May去左英國讀書喎!』
..........
阿康:『記唔記得中六個陣呢，我地個女班長阿詩呀! 前排我先係Facebook見到佢結婚，估唔到我地當年笑佢將來無人要，呢家竟然婚都結埋，好似仲話有左呀!』
..........
永言:『喂! 仲記唔記得阿欣呀? 我讀緊大學個陣追個個女仔呀! 我到呢家都仲好掛住佢.....佢仲差我幾百蚊未還呀!頂佢個肺!』
聚會上，朋友們之間都唔會介意講返自己以前追過既女仔，以前收收埋埋既對像都唔介意同人分享近況，不過唔介意係一回事，深刻記得又係另一回事。
軒仔雖然『三無』，不過佢份人好有毅力，對感情有自己個一套價值觀，當年佢追敏兒個陣，非常痴心同專一，可惜敏兒性格比較外向，做任何事都玩玩下，感情事都唔例外，一直都無同軒仔一齊過，但敏兒經常性地俾機會比軒仔，從來唔直接拒絕佢，而係當佢係"好人"，一個24小時隨傳隨到既好人。而軒仔都深信總有一日，佢既真誠會打動到敏兒。
但有一日放學，敏兒好快就執起書包走人，咁岩軒仔係校門口行過，見到敏兒出現，正想開口叫敏兒個陣，驚見敏兒同一個靚仔一齊，而且個男仔仲幫佢拎書包，之後手拖手咁，好甜蜜咁離開。
軒仔見到依一個情景，只有無奈咁望住佢地離去，而雙手則握得非常之緊。
軒仔沮喪左幾個月後，憤然的起心肝讀書，入左科大比較出名既商學系，再讀埋碩士同博士學位，畢業後搵到一份好好既工作，月入八萬，收入穩定。而且佢知道自己性格比較內向，唔係好識點待人接物，口才更加唔係突出。於是佢刻意咁訓練自己社交技巧，學好多唔同類型既野，運動又好，電腦又好，咩都去學，去試。
每一次聚會上，朋友們都覺得軒仔一次比一次成熟，加上軒仔性格隨和，同佢相處其實幾舒服，慢慢咁大家都覺得『樣』唔再係問題，反而性格衰，幾靚仔都幾乞人憎。
阿康:『大家仲記唔記得敏兒呀?』
永言:『中學個條姣婆?』
阿康:『係呀! 佢中學個陣已經成日玩，晚晚出去浦，男朋友又係咁換。前排我女朋友睇我張班相，見到敏兒，原來我條女識佢，佢話敏兒好開放，一夜情已經唔當係咩一回事，識到有錢仔就幾乎晚晚比人上，真係不知所謂。』
永言望一望軒仔，然後笑問:『軒仔你當年好似追過佢架喎! 你有冇食過佢先?』
『哈哈哈哈，條女咁放蕩!軒仔一定上過啦! 仲洗問既?』
眾人:『哈哈哈.....』
雖然我控制唔到人地所講既野，但睇得出軒仔聽到呢堆說話後，都顯得好哀傷，但仍然以笑容面對住朋友，個一刻，都慨嘆佢做乜要咁痴心。
過左好多年後。
軒仔突然間搵我出黎飲野，以軒仔咁忙既工作，突然間約我出黎，擺明就係有野想講。
個一晚佢飲左好多酒，佢一路飲一路講件事出黎。
『我有次.....同班同事放工去飲野，遠遠地見到一個人好面善，好熟口面，行近d一望，原來就係敏兒，唉.....歲月不饒人，雖然敏兒只係二十八歲，但個樣真係好殘，雖然個型仲係靚女，但.....比我感覺.......好似有病咁，有氣無力，最恐怖既......你知唔知我見到佢對眼神係點.....?』
『係點呀?』
軒仔拎住酒杯，一口氣飲哂杯上既酒，再說:『係充滿對人生感到絕望既眼神呀.......』
『當晚我同佢傾計，佢話好早就見到我出現，只係唔敢同我打聲招呼，佢猶豫左好耐好耐先行埋黎叫我，你知唔知.....當年佢好活躍，好主動，猶豫呢兩隻字絕對唔會出現係佢身上，因為怕羞既.....永遠都係我，但依家.....怕羞既竟然係佢。』
事實上，軒仔已經成為某大公司的總經理，年紀輕輕已經有五，六個下屬，而呢堆下屬之下又有五，六十個下屬.......軒仔可以話一人之下，萬人之上，怕羞既影子已經好早就消失左係佢身上。
個一晚，軒仔同敏兒傾左好耐，大家都傾返以前讀書既事，盡量都講開心野，唔開心既野都唔會提，亦唔想提。軒仔望一望手錶，見時侯唔早，好隨意就講左一句:『時侯唔早了，不如下次再約你一齊飲野。』
敏兒好快就答應左:『無問題，就聽晚，好嗎?』
軒仔個一刻係呆左，因為佢估唔到當年自己約左敏兒十幾廿次都約唔成，如今竟然一約就成功左。
講到呢到，軒仔叫多幾杯酒，又係一口氣飲哂佢，而我靜靜地坐係佢身邊聽佢講故仔。
軒仔:『佢.....想同我起埋一齊，但我唔知點咁。』
『點解呢?』 我問。
『當年我用盡心機去追佢，都唔成功。呢家個女仔主動想同我一齊，我覺得成件事好有問題......』
『有咩問題?』
『第一，敏兒依一刻竟然無男朋友。第二，我除左事業成功左之外，樣同身材都冇變，我又無靚仔到，又無大隻到，如果你話我變左，我只可以話我性格係成熟左，不過我一向對敏兒都係以最好既態度對佢.....我實在睇唔出有咩分別。』
軒仔愈說愈激動 :『當年我係傻仔一個，但係今時唔同往日，我係身處係利益衝突得好大既職場上面，所以我幾乎可以將一切量化......我唔係無情，而係覺得人地人地對我真心我就對人真心，人地想搵我笨我就同佢計較，我受傷太多，我唔害人，但係唔想再好似成日歡迎人地傷我咁，我當年鍾意佢，有愛情既憧憬，亦有非理性既衝動，我迷戀佢年輕既肉體，我唔會否認。當年我係窮小子一個，佢唔理我，得!都係無辦法既事。如今佢唔年輕又唔靚，連性格都消沉埋，完全唔似當年咁開朗積極既佢，再加上佢不停同唔同既男人一齊，我......無辦法，我真係無辦法唔計較。』
軒仔再激動地說:『對佢黎講，我永遠都係咁樣衰，佢鍾意我乜野呀? 突然覺得我好好人? 我不嬲都咁好人，我唯一唔同既係我有錢左。所以，對我而言，佢已經冇吸引力，年齡，樣貌，身材，性格都冇。對佢而言，我既吸引力來源係錢，而唔係我。佢望住我，我真係冇可能再鍾意佢.......』
個一刻，軒仔不斷講不斷飲酒，最後都醉埋訓左係到，而我再一次靜靜地坐係佢身邊，腦海重整返成件事，只係有一種無奈，唏噓既感覺。
《完》
Search